Sindicato Nacional de Comisións Obreiras de Galicia | 5 Abril 2025.

CCOO reclama un convenio galego para o sector da limpeza

    O sector da limpeza mobilizouse o xoves da man de CCOO para reclamar un convenio galego. Ducias de traballadoras e traballadores percorreron o derradeiro treito do Camiño de Santiago para pediren «un milagre»: condicións laborais dignas e axeitadas para o traballo esencial que realizan.

    04/04/2025.
    O sector da limpeza, da man de CCOO, reclama un convenio galego (3/4/2025)

    O sector da limpeza, da man de CCOO, reclama un convenio galego (3/4/2025)

    As persoas que participaron nesta convocatoria de CCOO-Hábitat partiron a mediodía do Monte do Gozo, en Santiago de Compostela, e remataron na praza do Obradoiro, onde realizaron unha performance cunha fregona de dezaoito metros.

    A secretaria xeral de CCOO-Hábitat, Alejandra Gesto, salientou que esta acción é unha expresión da «perseveranza, loita e esperanza dun colectivo esencial e feminizado, pero sistematicamente invisibilizado».

    Segundo explicou, este sector emprega máis de 20.000 persoas en Galicia, «a inmensa maioría, mulleres», que se encargan da hixiene de colexios, hospitais, centros de traballo, industrias e administracións públicas. Malia o labor esencial que fan, están sumidas nunha «precariedade estrutural», sobre todo económica.

    Neste sentido, denunciou que a patronal ofrece subas salariais «nulas ou testemuñais», e incluso asina convenios provinciais, como o de Lugo e Ourense, por baixo do salario mínimo interprofesional (SMI).

    Fronte a isto, CCOO formula como demandas urxentes subas salariais que eviten a perda de poder adquisitivo; a redución da xornada semanal a 35 horas, para previr trastornos musculoesqueléticos; a creación dun plus industrial que compense a perigosidade do traballo; a revisión das categorías profesionais para eliminar a discriminación de xénero; e avances en igualdade e conciliación.

    Cara a un convenio galego

    A principal aposta de CCOO para lograr estes obxectivos é superar o modelo de convenios provinciais, «que perpetúa a desigualdade entre territorios e colectivos». Por ese motivo, defende un convenio colectivo galego para poder negociar de maneira máis eficaz e xusta as condicións laborais das máis de 20.000 traballadoras e traballadores do sector.

      •