Sindicato Nacional de Comisións Obreiras de Galicia | 22 Outubro 2024.

17 de outubro, Día Internacional para a Erradicación da Pobreza

CCOO pide reformar a Risga: só 15 de cada 100 persoas en situación de pobreza percibe unha prestación

    Este 17 de outubro, Día Internacional para a Erradicación da Pobreza, o Sindicato Nacional de CCOO de Galicia fai un chamamento aos distintos poderes públicos a adoptaren as medidas necesarias para erradicar a pobreza e lograr unha sociedade humana e digna que non deixe a ninguén atrás.

    17/10/2024.
    CCOO elaborou un estudo que inclúe propostas para combater a pobreza

    CCOO elaborou un estudo que inclúe propostas para combater a pobreza

    A pobreza é un inadmisible problema social que pexa as vidas de milleiros de galegos e galegas. Segundo o indicador AROPE, no ano 2023 estaban en situación de risco de pobreza ou exclusión social 687 000 persoas; destas, 523 000 (case o 20 % da poboación galega) vivían por baixo do limiar da pobreza. A peor situación, as 220 000 persoas en situación de pobreza extrema.

    Fronte a isto, só 15 de cada 100 persoas en risco de pobreza teñen unha prestación: 5508 perciben a renda de inclusión social de Galicia (Risga) e 30 026 o ingreso mínimo vital (imv). Algo non se está a facer ben, sen dúbida.

    Non podemos esquecer a situación dos pensionistas galegos: a contía das súas prestacións está na maior parte dos casos por baixo do limiar da pobreza (algo máis da metade) e case dúas de cada dez teñen contías inferiores ao limiar de pobreza extrema.

    Neste grave contexto, desde CCOO consideramos que as redes de protección social deben desempeñar un papel determinante. O sistema público de pensións e de protección por desemprego e as rendas de inserción deben cubrir as necesidades básicas das persoas, en especial das que se atopen en situación máis vulnerable.

    Pero non abonda: cómpren outras medidas para reducir a desigualdade e a pobreza, como favorecer o acceso ás prestacións, garantir por lei a cobertura das necesidades vitais das persoas con máis dificultades, actuar sobre o desemprego de longa duración, asegurar o acceso a unha vivenda digna ou dotar de recursos humanos e económicos o sistema galego de servizos sociais.

    En palabras do secretario xeral das Nacións Unidas, «a pobreza non é inevitable». Por iso, este 17 de outubro, o Sindicato Nacional de CCOO de Galicia reivindica políticas de protección social que poñan as persoas no centro e ofrezan medios e oportunidades para saír da pobreza.

    Este texto foi aprobado como resolución do Comité de Dirección Nacional de CCOO do 17 de outubro do 2024.

    Documentación asociada

    Cadernos do Sindicato Nacional, n.º 50: «A pobreza en Galicia»

      •
    Documentación asociada

    Cadernos do Sindicato Nacional, n.º 50: «A pobreza en Galicia»