Sindicato Nacional de Comisións Obreiras de Galicia | 22 Decembro 2024.

Día da Clase Obreira Galega 2024

10 de Marzo: Mellorar o emprego · Máis igualdade · Fortalecer o benestar!

    O 10 de Marzo conmemoramos, un ano máis, o Día da Clase Obreira Galega. Lembramos aqueles feitos de 1972 en Ferrol que provocaron a convulsión dun sistema ditatorial. Esa data é reivindicada anualmente polo Sindicato Nacional de CCOO de Galicia e a Fundación 10 de Marzo. 

    07/03/2024.
    Temas
    10 de Marzo, Día da Clase Obreira Galega

    10 de Marzo, Día da Clase Obreira Galega

    En primeiro lugar, coa entrega dos premios do mesmo nome, nun acto de homenaxe a todas as persoas destacadas pola súa loita na defensa das liberdades e dos intereses de clase obreira. O propio día 10, as CCOO participamos en Ferrol no acto in memóriam de Amador e Daniel, que foron asasinados pola policía represiva do réxime cando se manifestaban polos seus dereitos. Concluímos cun acto de mobilización, lembranza e recoñecemento á loita a prol dos dereitos das traballadoras e traballadores: manifestación desde o estaleiro de Navantia ata o Monumento ao 10 de Marzo.

    Esa lembranza é a que nos move a mantermos firmes nos nosos valores. Daquel 10 de marzo de 1972 mantemos o vencello das Comisións Obreiras coa loita polas liberdades e a democracia. O dereito á negociación colectiva era unha aspiración dos traballadores e traballadoras, consubstancial á conquista de dereitos laborais e sociais que implicaba liquidar o modelo de relacións laborais do réxime franquista.

    Máis de medio século despois, a economía medra e, con ela, os beneficios empresariais; porén, sobre a calidade de vida dos traballadores e traballadoras mantéñense implacables os elementos de desvalorización. É unha responsabilidade desta organización impulsar un cambio de rumbo en Galicia con máis compromiso político, autogoberno, concertación social e xustiza social. Temos identificadas as cuestións que consideramos prioritarias para que Galicia se siga transformando e avanzando. CCOO non quere máis escusas ou atrancos para dar as solucións que reivindica a maioría da xente deste país, as solucións que demanda a clase traballadora galega.

    O Goberno galego, saído das urnas no mes de febreiro, debe liderar un novo modelo de crecemento económico, equilibrado, duradeiro e respectuoso co medio ambiente. Só nesas condicións a sociedade galega ampliará o seu horizonte de desenvolvemento e de cohesión social. Este novo modelo de crecemento ten que asentar na formación ao longo da vida, na innovación e na industria, na creación de emprego estable, de calidade e con dereitos, na protección ás persoas desempregadas e na igualdade entre mulleres e homes. Tamén ha contar con garantías para a protección da saúde no traballo, para asegurar condicións de vida dignas, comprometéndose cos nosos servizos públicos, con medidas para que as pensións, a educación, a sanidade ou a atención ás persoas dependentes sexan dereitos consolidados.

    A responsabilidade e o compromiso que caracterizaron os feitos de 1972 en Ferrol fanse hoxe en día máis necesarios ca nunca, porque non podemos permitir caer na demagoxia barata de certos sectores da sociedade e da ultradereita, que nos queren retrotraer a aqueles tempos en que os peor parados son sempre os que menos teñen. É a nosa responsabilidade sermos conscientes de que un Estado como o noso será social ou non será.

    Comisións Obreiras ten dado sobradas mostras da responsabilidade e do compromiso que nos caracterizan, do esforzo compartido. Compromiso e responsabilidade como o dos compañeiros e compañeiras de Bazán no 72.

     

    VIVA A CLASE OBREIRA GALEGA!!

    VIVA O DEZ DE MARZO!!

    VIVAN AS COMISIÓNS OBREIRAS!!

    DANIEL E AMADOR, NA MEMORIA!!

    Actos en Ferrol de CCOO para o 10 de Marzo:

    — 11 horas: ofrenda floral no Monumento ao 10 de Marzo

    — 12:30 horas: manifestación desde Navantia ata o monumento

    Documentación asociada

    Manifesto de CCOO polo 10 de Marzo do 2024

    Ligazóns relacionadas

    CCOO mobilizouse en Ferrol no Día da Clase Obreira Galega

      •
    Documentación asociada

    Manifesto de CCOO polo 10 de Marzo do 2024

    Ligazóns relacionadas

    CCOO mobilizouse en Ferrol no Día da Clase Obreira Galega