Sede da Xunta de Galicia | Foto: Google
Desde CCOO lembran que a avaliación do desempeño está prevista na Lei 2/2015, do 29 de abril, do emprego público de Galicia, e no propio Estatuto básico do empregado público (EBEP) do ano 2007, polo que sempre a apoiaría «se contribúe a mellorar a progresión profesional e a poñer en valor os servizos públicos». Non obstante, para que o procedemento teña plenas garantías, Comisións esixe transparencia no modelo, con información suficiente ao persoal e control sindical; establecemento de parámetros obxectivos e medibles; e que as avaliacións as faga unha comisión independente, con posibilidade de contraste.
Partindo destas premisas, o sindicato apoia a avaliación e mesmo que o resultado sexa de dominio público, «para que dunha vez por todas a poboación coñeza o nivel de eficiencia, eficacia e compromiso co que os empregados públicos desenvolven o seu traballo».
Nos últimos anos, as empregadas e empregados públicos realizaron o seu labor nun contexto de recorte de cadros de persoal, privatización de servizos públicos, mantemento dunha Administración paralela e o uso fradulento de figuras como as encomendas de xestión. Malia este contexto adverso, e incluso malia a pandemia, o persoal público «foi quen de responder e de manter en pé todos os servizos esenciais para que a cidadanía puidese seguir facendo unha vida o máis normal posible, dentro das circunstancias adversas», sinala a FSC-CCOO.
Por isto, CCOO critica que a Xunta de Galicia, no canto de poñer en valor este esforzo e dedicación, pretenda «someter a exame» o seu persoal e, por riba, sen contar coa representación legal dos traballadores e das traballadoras.
Para a FSC-CCOO, a Xunta «empeza mal», facendo o anuncio a través dos medios de comunicación en vez de dirixirse primeiro aos sindicatos. Comisións tampouco considera «idóneo» o procedemento de avaliación, que consistirá no rexistro das tarefas de cada unidade administrativa para analizar as cargas de traballo. CCOO leva anos pedindo unha «avaliación seria» das unidades administrativas e da carga laboral cada vez que hai unha modificación das relacións de postos de traballo, entendéndoa como un «elemento de mellora dos procedementos e dos resultados», e non como un instrumento «coercitivo ou de imposición de sancións».
Non obstante, o Programa marco porá riba da mesa unha das reclamacións de CCOO: a creación de órganos especializados e profesionalizados para a organización dos procesos selectivos derivados das ofertas públicas de emprego, para rematar co «caos» en materia de selección e provisión dos últimos anos. O Programa marco tamén debería servir para cambiar o modelo de xestión das entidades instrumentais gobernadas. Segundo CCOO, deberían situar á fronte persoal funcionario designado sobre a base dos criterios de igualdade, mérito e capacidade.